Unha moza de 19 anos perdeu a vida tras saírse da vía o vehículo no que circulaba pola estrada PO-254, ao seu paso polo municipio pontevedrés de Ponteareas. Segundo informou o 112 Galicia, foi un particular quen alertou deste sinistro no punto quilométrico 4 desta vía, na parroquia de Pías, sobre as 09.50 horas.
Ata o lugar, mobilizados pola central de emerxencias, desprazáronse profesionais do Servizo de Urxencias Sanitarias de Galicia-061, Policía Local, Garda Civil de Tráfico, servizos de mantemento da estrada e efectivos do GES-SPEIS de Ponteareas, que interviñeron para liberar á vítima.
A falecida é unha moza de 19 anos que á primeira hora desta mañá dirixíase a atoparse coas súas compañeiras do club de fútbol Sporting Club San Mateo para disputar un partido en Teo contra a SD Cacheiras, que foi suspendido. Tras transcender a noticia tamén se suspendeu o partido do Sporting Club San Mateo B.
A Federación Galega de Fútbol (RFGF) mostrou a súa “inmensa dor” polo falecemento de Paula Andrea, xogadora de 19 anos do Sporting Club San Mateo de Ponteareas. “Desde a RFGF enviamos un fortísimo abrazo aos seus familiares, ás súas compañeiras e compañeiros e a todos os que forman a familia do Sp. San Mateo”, publicou nas súas redes sociais. Tamén o clube da vítima emitiu un comunicado no que sinala que “non hai palabras para describir” o que senten tras este “terrible suceso”. “Onde esteas, sempre estarás entre nós”, conclúe.
