Un grupo de pequenas empresas provedoras do sector da construción denunciou falta de pagamentos por 1,5 millóns de euros, da empresa adxudicataria da construción de 14 naves no polígono de Porto do Molle, en Nigrán, pertencente á Zona Franca de Vigo.
Segundo explicou un dos afectados a Europa Press, a empresa adxudicataria, Construcións Alea de Ourense (que se fixo coa licitación, por valor de 7,6 millóns de euros), entrou en preconcurso e abandonou a obra que, por outra banda, está “practicamente finalizada”, pero os provedores (instaladores de portas, cubertas, fachadas, fontanaría, electricidade, seguridade contra incendios, etc.) non cobraron os seus traballos.
Así, un grupo dunhas 15 pequenas empresas atópanse “tirados” e coa incerteza de non saber se cobrarán polos servizos prestados, xa que a Zona Franca, como licitante, tampouco lles deu unha solución. “Nós empezamos a traballar nesa obra coa tranquilidade de que eran unhas naves para un organismo público, e na crenza de que iamos cobrar”, explicou este afectado, que afirmou que, agora, “o único” que queda é esperar a que a construtora entre en concurso e personarse como acredores, pero sen garantía de poder recuperar nada.
Respecto diso, lamentou que moitos dos afectados veranse abocados ao peche dos seus negocios, porque o volume da débeda failles inviable continuar. “Isto é a ruína para moitos de nós”, recoñeceu, e insistiu que, por parte da Zona Franca, obtiveron, “moitas boas palabras, pero ningunha solución”.
