A Fiscalía solicita que se impoña unha multa de 9.000 euros a Sinaí Giménez, como presunto autor dun delito de quebrantamento de medida, por vulnerar a orde de afastamento do mercadillo de Moaña, que lle impuxo como medida cautelar a Audiencia Provincial de Pontevedra, en 2017.

Esa medida, xunto coa retirada do pasaporte e o pago dunha fianza, estaba recollida nun auto de posta en liberdade de Sinaí Giménez, investigado por un xulgado de Cangas xunto a varios membros da súa familia por varios delitos (extorsión, ameazas, tenencia ilícita de armas, etc.) nun procedemento que aínda non chegou a xuízo.

Esa investigación policial concluíu en abril de 2016 coa detención de Sinaí Giménez e outra ducia de persoas (a maioría familiares e achegados seus), e o seu ingreso en prisión provisional. En agosto de 2017, tras o abono de 50.000 euros de fianza, Sinaí Giménez saíu da prisión de Villabona (Asturias), con esas medidas cautelares establecidas polo tribunal provincial, entre as que estaba a prohibición de achegarse aos mercadillos dunha decena de localidades da provincia de Pontevedra, entre elas, Moaña.

En agosto de 2023, foi detido pola Garda Civil cando se atopaba, segundo o escrito de acusación pública “a menos de 50 metros” do mercadillo de Moaña. Por iso, a Fiscalía considérao autor dun delito de quebrantamento de medida, e pide que se lle impoña unha multa de 9.000 euros. Así mesmo, o ministerio público pide que, se hai sentenza condenatoria, se lle notifique á Audiencia Provincial de Pontevedra, “tendo en conta que a liberdade condicional condicionouse a non achegarse, entre outros, ao mercadillo de Moaña”.

ANOS DE ‘ENCONTRÓNS’ COA XUSTIZA

Ademais deste, hai outros procedementos penais aos que se enfrontou Sinaí Giménez, a quen os seu grupo de afíns se refiren como ‘o rei dos xitanos galegos’ e que chegou a autodenominarse ‘o Obama galego’, cando se presentou ás eleccións pola Alcaldía de Vigo en 2015 (nas que obtivo 283 votos).

Ademais dalgunhas sancións menores por delitos de tráfico, Sinaí Giménez sentouse varias veces, xunto a membros da súa familia (coñecida como ‘clan dos Morones’), no banco dos acusados.

En maio de 2018 foi xulgado e logo condenado a 2 anos e 9 meses de cárcere por ameazar en 2015 no mercadillo de Redondela a vendedores xitanos ‘zamoranos’. En xullo de 2019 aceptou 4 anos de prisión por lesións, tamén a xitanos ‘zamoranos’, durante unha liorta no mercadillo de Cangas en 2015. Pouco despois, entrou en prisión para cumprir a pena polo ocorrido en Redondela e, desde o cárcere, compareceu nun novo xuízo. Nese caso foi por uns feitos ocorridos en 2014, cando participou na agresión a dous gardas civís e un avogado ás portas dos xulgados de Tui, e polo que aceptou un ano de prisión.

Sinaí Giménez saíu do cárcere e, en xullo de 2021, puido estar presente no xuízo contra un dos seus irmáns, que resultou condenado a 8 anos de cárcere por irromper nunha celebración de familias xitanas ‘zamoranas’ no Porriño, realizando varios disparos e ferindo a dúas persoas.

Ademais dos incidentes de Tui, Redondela e Cangas, Sinaí Giménez foi detido en maio de 2019 na localidade de Arapiles, en Salamanca, cando circulaba nun coche no que transportaba 3 quilos de haxix.