O alcalde de Vigo, Abel Caballero, anunciou que o xoves día 25 de xaneiro o Concello presentará na Feira Internacional de Turismo (Fitur), que se celebrará a semana que vén en Madrid, o seu “fenómeno turístico” que segue “batendo marcas”.
Nun audio difundido aos medios de comunicación, o rexedor olívico indicou que, un ano máis, a caseta de Turespaña será o lugar escollido para dar a coñecer a oferta turística da urbe, que dispón do “proceso de innovación turística máis importante de toda Europa e seguramente de todo o mundo”, segundo reivindicou Caballero.
En concreto, referiuse a o Nadal de Vigo, que supón a chegada de miles de visitantes, pero tamén á gastronomía dispoñible na cidade ou á súa oferta para o verán e para escapadas de fin de semana. “En suma, un fenómeno sociolóxico e turístico, con rango económico extraordinariamente importante. Isto é o turismo de Vigo”, reivindicou.
AEROPORTO
Precisamente, no mesmo audio, tamén falou das cifras de viaxeiros rexistradas polo Aeroporto de Vigo en 2023, que superou os 1.135.000 usuarios, un 19,2% máis que un ano antes.
Respecto diso, o alcalde puxo en valor que estes datos supoñen o cuarto mellor exercicio da historia de Peinador, polo que habería que remontarse 15 anos atrás para atopar cifras similares.
