A Garda Civil detivo en Tomiño a dous mozos do Rosal, acusados dun delito contra a saúde pública ao ser sorprendidos nun control de estrada con algo máis dun quilo de marihuana.
Os feitos sucederon este luns no transcurso dun punto de verificación de vehículos establecido por efectivos do Posto da Garda Civil de Tomiño no km. 78:700 da estrada PO-552 (Vigo-A Guarda), na rotonda de Figueiró (Tomiño).
As “sospeitas” que xeraron os dous ocupantes dun dos vehículos interceptados no control propiciaron que a Garda Civil leva a cabo unha minuciosa inspección do turismo, e no interior do maleteiro localizouse unha mochila con 13 tarros de cristal que contiñan 1.324 gramos de marihuana.
Tanto o condutor, A. L. G., de 20 anos, como o seu acompañante, M. F.A., de 21, os dous veciños do municipio do Rosal, foron detidos como supostos autores dun delito contra a saúde pública por tráfico de estupefacientes.
Esta actuación forma parte do plan de actuacións que vén desenvolvendo a Garda Civil na provincia de Pontevedra para erradicar a venda e distribución de estupefacientes a pequena escala.
Os detidos, que foron postos en liberdade nas dependencias do Posto da Garda Civil de Tomiño unha vez instruídas as dilixencias, deberán comparecer cando sexan citados ante o Xulgado de Instrución de garda de Tui.
