O alcalde de Vigo, Abel Caballero, anunciou que este domingo, día 14 de xaneiro, celebrarase o acto de apagado das luces de Nadal da cidade, á espera de que “deseguido” cheguen as próximas festas. Nun audio difundido aos medios de comunicación, o rexedor informou de que será a partir das 19.15 horas cando dea comezo este evento para despedir o Nadal, que estará cheo de “contido simbólico”.
Segundo el, o obxectivo é lanzar a idea de que “deseguido” chegará o próximo Nadal e outra vez Vigo volverá ocupar “un lugar excepcional” e estará de novo iluminada no mes de novembro. Caballero volveu a cargar contra o PP e o BNG de Vigo, tachándoos de “inimigos” e asegurando que presentaron denuncias para “pechar o Nadal de Vigo”.
TURISMO DE CONGRESOS EN VIGO
Por outra banda, ademais do turismo que as luces de Nadal achegan á urbe olívica, noutro audio Caballero falou dos visitantes chegados en 2023 á cidade grazas aos 102 eventos celebrados en Vigo. Segundo as súas cifras, foron máis de 68.000 as persoas que participaron nos distintos congresos e feiras que levaron a cabo en Vigo, destacando Conxemar ou Mindtech, entre moitos outros. O alcalde subliñou que a xente que asistiu ten un “elevadísimo” nivel de satisfacción coa cidade e os seus servizos.
