Axentes da Policía Local de Vigo detiveron unha muller de 55 anos de idade, E.E.O., por un presunto delito de violencia no ámbito familiar, tras ameazar cun coitelo á súa filla de 14 anos despois de que a menor interrompese unha cea que estaba a celebrar con invitados no salón da vivenda, a pasada Noitevella.
Segundo informaron fontes policiais, os feitos ocorreron na madrugada do 1 de xaneiro, cando o 092 recibiu unha chamada informando deste episodio violento, nunha vivenda da rúa Urzáiz.
Cando os axentes chegaron ao lugar, escoitaron berros e ameazas e atopáronse a porta do domicilio aberta. No interior da vivenda había tres menores, dous nenos e unha nena, e esta estaba a chorar. A nena explicou aos axentes que a súa nai a ameazou e intimidou, colocándolle un coitelo na cara, polo que fuxira para refuxiarse nun cuarto.
Os outros dous menores, de 12 e 16 anos de idade, corroboraron a versión da nena, a súa irmá, e explicaron que a súa nai se enfadou moito con ela porque entrara no salón, onde a muller estaba a cear con invitados. A nai prohibira aos fillos que entrasen nesa zona da vivenda.
Ademais, os menores manifestaron de forma espontánea aos axentes que a nai a ameaza con frecuencia e mostra cara a eles comportamentos agresivos de forma habitual. Ao entrevistarse coa muller, esta recoñeceu aos policías que ameazara á nena cun coitelo porque entrara no salón onde ceaba, a pesar de que o tiña “prohibido”.
Os axentes procederon á súa detención, por un suposto delito de violencia no ámbito familiar, mentres que deron aviso a unha familiar, unha tía, para que se fixese cargo do tres nenos. A Policía porá os feitos en coñecemento dos servizos sociais.
DETENCIÓN POR AGRESIÓN A POLICÍAS LOCAIS
A Policía Local de vigo detivo a un home de 39 anos de idade, F.C.L., como presunto autor dun delito de atentado contra axentes da autoridade, tras encararse e agredir aos membros dunha dotación que interviñan con motivo dun altercado nos exteriores dun local de lecer.
Segundo informaron fontes policiais, os feitos ocorreron na madrugada do pasado sábado, cando o 092 recibiu un aviso para acudir a unha discoteca da rúa Irmandiños, debido á presenza dunha moza en actitude moi agresiva, que estaba a atacar a outros clientes.
Ao chegar, os axentes viron a moza no exterior do establecemento, nun estado moi violento e cunha ansiedade e axitación considerable, polo que se avisou ao 061. Os facultativos decidiron o traslado da moza ao Hospital Álvaro Cunqueiro.
Mentres se estaba producindo esta intervención, un individuo aproximouse aos policías e comezou a increpalos, berrando que deixasen “en paz” á moza e chamándoos “asasinos de merda”. Este home, segundo informou a Policía Local, increpou aos axentes, lanzoulles a carteira cando lle pediron a identificación, e propinou unha puñada e unha patada a un dos funcionarios, polo que foi detido.
