A sección sindical da CIG no hospital Ribeira Povisa de Vigo confirmou este martes que non asinará o convenio colectivo pactado entre a empresa e a maioría do comité, ao supor a “introdución dunha dobre escala salarial”, entre outros aspectos negativos.

Nun comunicado, o sindicato trasladou que tamén rexeita a contratación fixa descontinua, a vinculación da carreira profesional e a subida de salarios (de 2025) ao concerto co Sergas, ou que non se inclúa nas táboas salariais o ‘plus’ de noites.

A CIG lamentou que a maioría de sindicatos (excepto esta central e o SGPS) acordase coa empresa a aceptación do complemento chamado CRAD. “Trátase dunha medida discriminatoria que establece unha dobre escala salarial, de modo que o persoal contratado a partir do 31 de decembro ingresará de media 100 euros menos ao mes, aumentando así as diferenzas existentes”, sinala a central nacionalista. Ademais, este complemento “só está garantido durante a vixencia do convenio (2024-2025)”.

Con respecto á contratación fixa descontinua, a CIG apuntou que “non ten cabida” no hospital porque, coas modalidades de contrato actuais “xa están cubertas as necesidades”. Introducir contratos fixos descontinuos “supón precarizar aínda máis as condicións de traballo”, sinalaron desde a sección sindical.

Tamén criticaron que se vincule a carreira profesional e a subida de soldos de 2025 ao concerto co Sergas. Así, establécese que Povisa e Sanidade deberán ter asinado a 31 de decembro de 2024 un novo concerto distinto ao actual ou ás prórrogas. “O persoal non ten representación nesa mesa de negociación, polo que non pode influír para garantir as súas condicións laborais e salariais”, denunciou a CIG.

Finalmente, rexeitaron que non se recolla o ‘plus’ de noites nas táboas salariais, polo que non está vinculado á subida de soldos que sexa de aplicación en cada convenio.