A concelleira de Urbanismo de Vigo, María José Caride, explicou este martes que a zona de Cabo Estai, no litoral da parroquia de San Miguel de Oia, onde se proxecta a construción de varios chalés de luxo, xa era chan urbano no Plan Xeral de Ordenación Municipal (PXOM) de 1993 e no de 2008, “o plan do BNG e o PP”, e que o seguirá sendo no novo plan urbanístico que se está tramitando.

Nunhas declaracións gravadas e remitidas aos medios, Caride subliñou que o novo PXOM, que está pendente da súa aprobación provisional (tras a aprobación inicial, en agosto de 2021) non fai máis que manter a clasificación do chan nese ámbito, tamén contemplada no Instrumento de Ordenación Provisional, e rexeitou as acusacións de “pelotazo” do BNG.

Respecto diso, insistiu en que a zona xa era chan urbano “de licenza directa” na PXOM de 2008, un plan que atribúe ao BNG e ao PP, aínda que ese plan foi aprobado sendo Abel Caballero alcalde, e tras introducirse as modificacións que o goberno local, entón de PSOE e BNG, considerou oportunas (entre elas, o aumento de vivenda protexida).

Ese Plan Xeral, de cuxa seguridade xurídica presumiu o propio Caballero, que chegou a dicir que a súa aprobación fora “o logro máis importante” de Vigo ese ano, foi anulado en 2015 polo Tribunal Supremo, debido a que a Consellería de Política Territorial (precisamente dirixida por María José Caride naquel momento) avalou a innecesariedade de sometelo a avaliación ambiental estratéxica.

Con todo, a concelleira socialista de Urbanismo non aclarou por que no PXOM aprobado inicialmente en agosto de 2021 esa área figuraba como chan rústico de especial protección de costas. De feito, o secretario municipal emitiu un informe acerca dun polémico viario que se estaba executando na zona, declarando que non se axustaba á legalidade, como tampouco eran legais as licenzas para agrupar unhas parcelas na zona, nas que se proxecta a construción de chalés de luxo.

O alto funcionario sinalaba que unha das licenzas estaba vinculada a unha parcela xerada fóra da legalidade e, ademais, tanto o novo PXOM (o aprobado inicialmente) como o Plan de Ordenación do Litoral clasificábana como chan rústico costeiro de especial protección. Ademais, engadía, que a construción de cinco chalés nese “fráxil” espazo natural “non observa o canon mínimo de adaptación ao ambiente”.

En todo caso, María José Caride defendeu que o novo PXOM mantén a clasificación do chan neses terreos, e subliñou que este plan recolle as necesidades da cidade, coa garantía dun 37 % de ámbitos de vivenda protexida, chan industrial, equipamentos, infraestruturas e dotacións, e que é “tremendamente respectuoso” coa contorna.

“Que ninguén se equivoque, non busca a especulación, senón que promove actuacións responsables, equitativamente distribuídas”, proclamou, e engadiu que, con este goberno local, “acabouse a especulación”.