A Garda Civil de Baiona-Nigrán detivo a dous veciños de Vigo, ambos de 18 anos, e investigan a un terceiro, de 33 anos, como presuntos autores de cinco roubos con forza en chiringuitos en diferentes praias do municipio pontevedrés de Nigrán durante o verán de 2022.

Segundo informou o Instituto Armado, o modo de actuar era, tras forzar as portas ou xanelas, subtraían diñeiro, comida e bebida. Ademais, no transcurso da investigación atribuíronlles outros dous roubos con forza nunha empresa de pozos de auga da que levaron 3.000 euros en efectivo e un teléfono móbil, así como tres roubos máis en máquinas expendedoras de dous barrios de Nigrán.

Tanto os dous detidos como o investigado teñen antecedentes por feitos similares. As dilixencias instruídas foron entregadas no Xulgado de Instrución número sete de Vigo en funcións de garda e en Fiscalía de Menores, onde deberán comparecer os detidos e investigados.