A Consellería de Sanidade defendeu a nova prórroga do contrato co hospital Povisa para a asunción da cobertura de parte da poboación da área de Vigo, que foi asinado en 2014 e que estará en vigo ata agosto de 2024 en virtude da segunda extensión extraordinaria aplicada desde o pasado 1 de setembro.
Segundo detallou a secretaria xeral técnica da Consellería de Sanidade, Natalia Lobato Mosquera, en resposta a unha pregunta na Comisión 5ª da deputada do BNG Montse Prado, a tarifa que abona o Sergas a Povisa por cada paciente que escolle ter este centro como referencia é de 540 euros ao ano.
Ante as denuncias da parlamentaria nacionalista que acusou á Consellería de Sanidade de actuar con “total opacidade” na súa relación con Povisa, a responsable do Executivo galego sinalou que “toda a vida do concerto” con esta entidade privada está dispoñible para consulta “no perfil de contratante” do Portal de Transparencia. Alí, remarcou, “poden consultarse todas as vicisitudes” dun contrato que expirará o próximo verán e que, segundo Lobato Mosquera, será reformulado nun novo que “se tramitará polo procedemento que se determine de acordo á Lei de Contratos”.
NOVA FACULTADE DE FARMACIA
Por outra banda, o secretario xeral de Universidades, Alberto Díez de Castro, mostrou a súa confianza en que a Universidade de Santiago (USC) licite o próximo ano a fase uno do proxecto do novo centro de Ciencias da Saúde, que contempla a nova Facultade de Farmacia. Así o manifestou despois de que o deputado do PSdeG, Xullo Torrado, instase á Adminitración autonómica a comprometerse en apoiar á Universidade compostelá na construción dunhas novas instalacións para unha titulación que, desde o peche en 2105 do centro por problemas estruturais no edificio, repártense entre varias dependencias da institución académica.
