O grupo municipal do PP no Concello de Vigo volveu a denunciar este mércores a “incompetencia” do goberno local para executar “en tempo e forma” obras que contaban con axudas do fondo europeo Next Generation, o que obriga a devolver eses fondos, e criticou que, á axuda de 760.000 euros para a reforma do mercado de Teis súmanse tamén outros 240.000 euros concedidos a través da FEMP para reforma de dous parques infantís.

O edil ‘popular’ Miguel Martín explicou, nunhas declaracións remitidas aos medios, que as reformas dos parques infantís de Camilo José Cela e O Berbés aínda non comezaron, e iso a pesar de que as axudas concedidas e de que ditas axudas teñen un prazo para execución dos traballos que finaliza o 31 de decembro deste ano.

Deste xeito, é case un millón dos euros o que o Concello terá que devolver pola “incapacidade” do goberno local de xestionar os seus propios proxectos, que “deixa escapar” unhas axudas e obriga a que as iniciativas se financien con cargo “aos petos” dos veciños.

“De nada serve anunciar ao catro ventos a concesión de fondos se es incapaz de executalos en tempo en forma, ou porque se che esquecen porque están máis preocupado polas luces de Nadal”, proclamou Miguel Martín, que esixiu ao goberno local que dea a coñecer “cantas subvencións de fondos Next Generation” quedarán fóra de prazo, “porque hai máis”.

O concelleiro do PP censurou a falta de control do goberno vigués sobre os seus propios proxectos, por perda de axudas ou polo sobrecusto, como ocorreu co ascensor HALO, e advertiu de que, con respecto á reforma dos parques infantís, o alcalde non pode escusarse dicindo que as investimentos se pasarán a 2024, porque a propia FEMP confirmou ao grupo ‘popular’ “por escrito”, “non se produciu ampliación nin modificación de prazos” para executar as obras subvencionadas.