A CIG anunciou este martes a posta en marcha dunha campaña de información, concienciación e mobilizacións en defensa da automoción galega ante a “falta de política industrial” que, ao seu xuízo, “ameaza o futuro do sector”.

En rolda de prensa, o secretario nacional da CIG-Industria, Xoán Xosé Bouzas, alertou das ameazas que comprometen o porvir da automoción e dos miles de empregos ligados á mesma, denunciando os “insoportables niveis de precariedade e de inestabilidade laboral” que padecen os traballadores.

“A falta dunha política industrial por parte da Xunta e a ausencia de investimentos por parte da empresa principal, Stellantis, de face á fabricación de novos modelos de vehículos eléctricos comprometen seriamente a supervivencia do sector”, lamentou Bouzas, que estivo acompañado pola coordinadora de Automoción da federación, María Xosé García.

Ambos abordaron os retos que afronta o sector, como as actuais condicións de traballo e o proceso de transformación da automoción a nivel mundial.

Así, aseguraron que Galicia non rexistrou a instalación de ningunha nova empresa de compoñentes desde que se puxo en marcha o proceso de descarbonización e anunciouse a prohibición de fabricar coches de combustión a partir de 2030.

“Nin a fábrica chinesa que se anunciou para Vigo primeiro, nin a de baterías que ía vir despois saíron adiante, mentres vemos como se están reforzando os polos industriais do norte de Portugal, de Aragón-Áraba ou o africano”, engadiron, segundo recolle a CIG nun comunicado.

Por iso, o sindicato iniciará unha campaña de protestas, que comezará cunha manifestación este xoves, día 16 de novembro, en Vigo, partindo desde As Travesas ata Stellantis ás 18,00 horas.