Ante o despregamento de doce pistolas eléctricas tipo táser en Vigo por parte da Policía Nacional a finais de setembro e o uso dunha táser a finais de agosto por parte da Policía Local de Redondela, Amnistía Internacional enviou senllas cartas ao Comisario Xefe da Policía Nacional de Vigo e á alcaldesa de Redondela nas que pide “garantías do seu uso acorde coas normas internacionais”.

A organización apunta que, “a pesar de estar catalogadas como ‘menos letais'” documentáronse “casos nos que a morte dalgunhas persoas estivo relacionada co uso destes dispositivos de electrochoque ou de descarga eléctrica de proxectís”.

Nas cartas, Amnistía Internacional recoñece a importancia de que os funcionarios encargados de facer cumprir a lei “dispoñan de ferramentas” como estas para “minimizar o perigo de mortes e lesións”.

Por iso, argumentan, non se opoñen ao seu uso, aínda que lembran que este “debe de estar suxeito a un criterio similar ao aplicado no uso das armas de fogo”, sinalou a portavoz local de Amnistía Internacional, Isabel Flores.