O delegado do Goberno en Galicia, Pedro Blanco, confirmou a chegada ao municipio pontevedrés do Porriño de 40 migrantes procedentes de Canarias, mentres criticou que a Xunta e “algúns alcaldes” non mostrasen “ningunha solidariedade” nas últimas semanas.
En declaracións aos medios este martes, Blanco asegurou que finalmente chegarán a Sanxenxo menos de 100 migrantes, “entre uns 80 ou 90”, dos 350 que estaba previsto que se situasen na localidade pontevedresa entre o día 1 de novembro e o día 8. Así mesmo, tamén afirmou que xa lle trasladou ao alcalde de Sobrado dos Monxes que o seu municipio non recibirá migrantes e defendeu que estes traslados desde Canarias son “legais e ordenados” para atender á “demanda do Goberno canario”, que se vía “desbordado”.
“Por este tipo de ruído, por parte da Xunta, así como por algúns alcaldes, houbo que facer este tipo de cambios. Non é de recibo que o PP neste sentido estea baixo a aparencia ou desculpa de que non hai información, que a había clara e constante, e poña, dalgunha maneira, paus nas rodas para botar unha man para aliviar a presión que se estaba producindo en Canarias”, remarcou o delegado do Goberno.
DECLARACIÓNS “DESAFORTUNADAS”
Sobre estes cambios de localización e de número de persoas de acollida en Galicia, Blanco asegurou que “desgraciadamente” obedecen ás “últimas declaracións que se fixeron nas últimas semanas nos medios de comunicación”, que cualificou de “desafortunadas”.
“Por este tipo de ruído, por parte da Xunta, así como por algúns alcaldes, houbo que facer este tipo de cambios. Non é de recibo que o PP neste sentido estea baixo a aparencia ou desculpa de que non hai información, que a había clara, constante e desde o primeiro momento, e poña, dalgunha maneira, paus nas rodas para botar unha man para aliviar a presión que se estaba producindo en Canarias“, remarcou o delegado do Goberno.
Nesta liña, censurou que “non é de recibo” e é “absolutamente reprochable” que se faga “ruído”, así como “criticar que se vaian a traer a Galicia”, cando se fala de acoller migrantes, “igual que se acolleron coa guerra de Ucraína ou de Afganistán”. “Os galegos somos solidarios, abrimos os brazos a calquera persoa que veña con este tipo de drama e, por tanto, creo que non nos representa a Xunta nese tipo de declaracións nin as autoridades locais que puxeron todo tipo de trabas”, lamentou.
Neste punto, o delegado do Goberno agradeceu ao alcalde de Vigo, Abel Caballero, e á alcaldesa da Coruña, Inés Rey, que “só puxeron vantaxes e os brazos abertos para acollelos”. Nestas dúas cidades, segundo afirmou Blanco, xa se recibiron migrantes “con absoluta normalidade”.
“PREVISIÓNS”
Por outra banda, lembrou que o Ministerio chegou ao acordo de abrir varios cuarteis como centros de acollida, polo que, engadiu “será posible trasladar a uns 2.000 ou 3.000” a estas localizacións, pero, en principio, non chegarán a Galicia os 400 que ían vir. Con todo, insistiu en ser “prudente”, porque se fala de “previsións” “A data de hoxe non son 400, son menos. As organizacións que están en contacto co Ministerio e cos locais que teñen, cos centros de hostalaría e locais de acollida, poden nun momento dado facer outro traslado ordenado e, desde logo, legal”, manifestou.
CRÍTICAS Á XUNTA
Neste contexto, Pedro Blanco volveu a asegurar que durante os últimos días falou tanto co presidente da Xunta, Alfonso Rueda, como cos alcaldes dos municipios implicados, polo que, ante as críticas de falta de información e comunicación, o representante do Goberno preguntouse se entenden que “o delegado non é o interlocutor adecuado”. Así, reprochou á Xunta que non mostrase “ningunha solidariedade” durante estas semanas. “Non se mostrou ningunha solidariedade por parte de quen debería mostrala, que eran nin máis nin menos que os alcaldes e, neste caso, a Xunta de Galicia”, censurou.
O ALCALDE DO PORRIÑO DI NON SABER NADA
A pesar de que o delegado do Goberno asegurou este martes que falou co alcalde do Porriño, Alejandro Lorenzo, este, en declaracións aos medios, asegurou ter “total descoñecemento” e só “de maneira extraoficial” a través do albergue privado. “Non sabemos nin como nin cando, e esa é a tristeza que ten o Concello, que non teñamos ningún tipo de información nin ningunha situación que podamos prever nin nada”, lamentou.
Afirmou que tentou en varias ocasións porse en contacto coa Delegación, pero, segundo trasladou, non puido falar co delegado do Goberno. O rexedor popular sinalou que “non existe coordinación, nin comunicación, nin información” co Executivo central e, ante esta situación, tras defender que son un pobo “solidario e acolledor”, demandou información e que se lles “respecte”. “O delegado está no Porriño e non avisa e ante algo tan importante non tiñamos información. Pedimos coordinación e respecto“, resolveu o alcalde.
A XUNTA LAMENTA “FALTA DE RESPECTO INSTITUCIONAL”
Pola súa banda, a conselleira de Política Social e Xuventude, lamentou a “falta de respecto institucional por parte do Goberno central” e defendeu que Galicia é “unha terra solidaria”, tal e como se demostrou “sempre” e como se vai a demostrar “agora”. Así, asegurou que o Goberno galego non ten “máis información adicional” que a primeira comunicación na que se lles trasladou que ían chegar 350 persoas a Sanxenxo e 40 a Sobrado. Censura que se decataron polos medios de comunicación da decisión de situar a 40 migrantes no Porriño.
“Creo que as cousas non se fan así. Pode haber unha mellor colaboración, porque iso redundará no beneficio de todos, tanto de todos os migrantes como de todos os galegos que estamos aquí”, sostivo. Esta tarde, o ministro de Inclusión, Seguridade Social e Migracións, José Luís Escrivá, convocou unha reunión informativa por videoconferencia na que informará a alcaldes dos principais municipios españois, á presidenta da FEMP, María José Pelayo e aos conselleiros das comunidades autónomas deste asunto.
