A Asociación de Industrias do Metal e Tecnoloxías Asociadas de Galicia, Asime, liderará un proxecto financiado con 1,4 millóns de euros de fondos europeos, para impulsar un polo de eólica mariña que sexa referente na eurorrexión Galicia-Norte de Portugal.
Así, o proxecto AOWINDE (Atlantic Offshore Wind Energy), que se executará ata 2025, conta con varios socios estratéxicos, entre os que están, ademais de Asime, a secretaría xeral de Industria da Xunta, o Inega, as universidades de Vigo e A Coruña, a Cámara de Viana do Castelo, o Instituto Politécnico de Viana do Castelo, o Instituto de Enxeñaría, Tecnoloxía e Ciencia de Sistemas e Informática (INESCTEC), o Centro de Apoio Tecnolóxico á Industria Metalmecánica (CATIM) e a Asociación de Metalúrxicos, Metalmecánicos e Industriais Afíns de Portugal (AIMMAP).
Segundo explicou o secretario xeral de Asime, Enrique Mallón, esta iniciativa pretende “situar a eurorrexión como polo de referencia internacional en eólica mariña“. Así, trazarase unha “folla de ruta común transfronteiriza” para xerar un ‘hub’ industrial, poranse en marcha plans de formación especializados; crearase un “observatorio transfronteirizo de tecnoloxías emerxentes e instrumentos financeiros” para “atraer investimentos”; e levarán a cabo “actuacións para transformación e modernización de laindustria”.
O proxecto tamén contempla a creación dun “piloto virtual” para simular un parque transfronteirizo, co que poder medir non só a implantación a nivel operativo, senón tamén o seu impactomedioambiental, socioeconómico e compatibilidade con outras actividades como a pesca ou coa biodiversidade. A iso sumaranse campañas de sensibilización e difusión.
Asime trasladou que “un dos principais resultados esperados da execución do proxecto é a posta en valor da compatibilidade da eólica mariña con outras actividades no espazo marítimo, como a pesca, as rutas marítimas ou a acuicultura”.
“Nunca defenderemos a enerxía eólica mariña se prexudica ao resto de actores, pero temos que avanzar e ten que haber experiencias que demostren, como xa ocorre en moitos outros países, que a compatibilidade entre actividades é totalmente posible”, sinalaron desde a asociación.
Para Enrique Mallón, AOWINDE “representa unha gran oportunidade para o desenvolvemento industrial da eurorrexión Galicia-Norte de Portugal” e ten “gran capacidade de creación de emprego”.
O proxecto presentarase nunha xornada de lanzamento o próximo 10 de novembro, ás 11,00 horas, no Museo do Mar de Vigo. Durante o evento daranse a coñecer as súas principais liñas de actuación e actividades, e ofrecerase un foro de ‘networking’ paraque empresas galegas e portuguesas da cadea de valor debatan sobre os retos da industria eólica mariña na eurorrexión.
