As unidades do servizo da Policía Local de Vigo informaron de que este martes atenderon ata 70 incidencias derivadas do forte temporal de choiva e vento que azoutou a cidade olívica e os seus arredores, do mesmo xeito que o resto da comunidade.

Entre outros incidentes, a policía enumera árbores caídas sobre vías de tránsito, afectando a algún vehículo causándolle danos leves (caeu un de dimensións significativas sobre un parque infantil); pero tamén o desprazamento de colectores por efecto do vento ata o medio da calzada (cortando a circulación nalgúns casos).

Tamén se rexistrou o desprazamento doutros elementos como macetas, carteis, chapas metálicas, valos de obra e publicitarias; a caída dunha cornixa; e problemas puntuais con postes e cableado dos tendidos eléctrico e telefónico.