A Unidade de Vixilancia de Edificios Xudiciais avalou o servizo de seguridade previsto pola Xunta para a Cidade da Xustiza de Vigo, a pesar das queixas rexistradas por sindicatos. Así llo trasladaron os responsables desta unidade, por parte da Policía Nacional, Vicente Rivero, e da Garda Civil, Miguel Estévez, ao director xeral de Xustiza, José Tronchoni, nunha reunión mantida este venres.
Para eles, a seguridade da Cidade da Xustiza “está garantida e conta con todos os efectivos necesarios” conforme ao convenio co Ministerio de Interior asinado en 2018 e que foi actualizado en decembro. Eles apuntaron que non é necesaria vixilancia presencial durante 24 horas. Nun comunicado, a Xunta lembrou que tras a inauguración das novas instalacións, concentráronse nunha única sede todos os servizos xudiciais vigueses, excepto o Rexistro Civil, pasando de seis sedes xudiciais a dúas.
Por este motivo, reorganizouse o servizo de vixilancia para dar resposta aos actuais riscos. “Pódese garantir que o servizo prestado é superior ao que se facía de forma individual nas antigas sedes. En concreto, prestan os seus servizos nos dous edificios de Vigo, en combinación co de Redondela, 20 efectivos“, sentenciou o Goberno galego.
Todo iso a pesar de que precisamente a CIG-Servizos convocase para o vindeiro luns, día 18 de setembro, unha concentración en rexeitamento ao novo concurso de adxudicación do servizo de vixilancia e seguridade nos edificios xudiciais de Galicia e en concreto no de Vigo, criticando que os pregos do contrato non contemplan unha dotación económica suficiente para cubrir os gastos salariais do persoal que vai ser subrogado e que o concurso non dá resposta ás necesidades de vixilancia e seguridade das instalacións.
