O británico Paul Weller encabeza o cartel deste ano do Underfest SON Estrela Galicia, un evento musical que contará nesta edición con 14 concertos en ata sete recintos diferentes da cidade de Vigo. En concreto, o Museo Marco, o auditorio Mar de Vigo ou as salas Masterclub e La Iguana son algúns dos escenarios que acollerán os espectáculos, que contan co apoio da Xunta de Galicia.
Precisamente o Goberno galego, nun comunicado, puxo en valor o festival, que levou a cabo este martes a súa presentación oficial, á que acudiu o director da Axencia Galega de Industrias Culturais, Jacobo Sutil. El destacou o “atractivo e o perfil internacional” deste encontro, que lle dá ao público vigués a oportunidade de vivir unha cita musical “de primeiro nivel”.
O Underfest abrirá a súa programación o vindeiro venres, día 15 de setembro, a partir das 18.30 horas no Museo Marco. Será o cantante Sam Amidon o encargado de iniciar o festival, que se estenderá ata o sábado 16. Entre outros artistas, no cartel aparecen nomes como Blood Red Shoes, PVA, La Élite, Queidem ou Latorre, entre moitos outros.
