A delegada territorial da Xunta en Vigo, Ana Ortiz, mantivo este martes unha reunión co presidente da Autoridade Portuaria, Carlos Botana, na que acordaron colaborar para promocionar a través de actividades a imaxe da cidade o próximo 19 de setembro, cando a urbe olívica celebrará unha “xornada histórica” ao recibir ata cinco cruceiros con miles de turistas.

En concreto, será a fronte marítima da cidade o lugar elixido para levar a cabo estas iniciativas, co obxectivo de promocionar a imaxe turística de Vigo. Tanto Ortiz como Botana acordaron colaborar nos actos que se levarán a cabo o vindeiro martes, día en que por primeira vez Vigo recibirá ata cinco cruceiros á vez.

Así, espéranse máis de 10.000 pasaxeiros e preto de 5.000 tripulantes, polo que o Goberno galego ofrecerá un recibimento aos turistas dos buques que se situarán no peirao de Transatlánticos (Anthem of the Sexas e Disney Dream) e na Andrómena (Silver Moon, o Scenic Eclipse e o Ambition). Pola súa banda, o Porto porá a disposición dos cruceristas lanzadeiras para facilitar o seu traslado.