O Parlamento acordou como resolución manifestar o seu apoio ao conxunto dos profesionais do sector pesqueiro galego, en particular á frota de Vigo, “exemplo de compromiso co cumprimento da lei, da rastrexabilidade e da loita contra a pesca ilegal, non declarada e non reglamentada”.
Por unanimidade, ante unha iniciativa que defendeu o PPdeG, a Cámara reproba “calquera valoración que, afastada da realidade, supoña pór en cuestión o seu bo facer, como é o caso do documental elaborado por National Geographic baixo o título ‘pescado de contrabando”.
A deputada do PPdeG Teresa Egerique mostrou o seu respecto á liberdade de expresión, pero rexeitou a “infamia” dun documental cuxo trailer con alusións a Vigo foi retirado.
Pola súa banda, a parlamentaria do BNG María do Carme González criticou os “tópicos trasnoitados sobre Galicia” dos que “tira” o documental, “tratando de danar a un sector que leva anos traballando para adaptarse” ás esixencias normativas.
Así mesmo, referiuse a “información que non foi contrastada nin co porto nin co sector” e aseverou que en Vigo están “fartos desta situación”.
Por parte do PSdeG, Patricia Otero advertiu de que “hai liñas vermellas” e “non se poden difundir noticias sen contrastar como as que ían no trailer deste documental”. Aínda que foi retirado, avisou, “non está claro que nun futuro non poida utilizalo”, por iso os socialistas piden “que se retire e reclámense responsabilidades porque o dano está feito”.
