O Ministerio de Cultura e Deporte concedeu os Premios Nacionais de Música 2023 ao guitarrista Juan Manuel Cañizares e ao compositor vigués Eduardo Soutullo.
O xurado propuxo a Soutullo a quen lle foi outorgado o recoñecemento “polo unánime recoñecemento internacional da súa música, especialmente a súa produción orquestral, destacando a estrea en 2022 en San Petersburgo da súa cantata ‘El lamento de los girasoles'”, segundo subliñou nun comunicado o departamento que dirixe Miquel Iceta.
Os premios, dotados con 30.000 euros cada un, decidíronse por parte dun xurado presidido polo director xeral do Instituto Nacional das Artes Escénicas e da Música (INAEM), Joan Francesc Marco, e actuando como vicepresidenta a subdirectora xeral de Música e Danza, Ana Belén Faus Guijarro.
