A dirección da planta do grupo Stellantis en Vigo comunicou ao persoal novas alteracións na actividade, con novas paradas que afectarán aos dous sistemas de produción, debido aos problemas de subministracións.

Así, esa falta de aprovisionamentos obriga a suspender a actividade na quenda de noite deste venres e do domingo no sistema M1, que monta os modelos Peugeot 2008, C-Elysée e Peugeot 301.

Mentres, o sistema M2, que monta as furgonetas nas súas diferentes versións, parará na xornada do sábado e na quenda de noite do domingo. A produción na factoría viguesa xa estivo parada en varias quendas antes esta semana, e tamén houbo alteracións xusto despois do regreso do persoal do período vacacional.