O PP pediu este xoves ao goberno municipal de Vigo a “máxima axilidade” na tramitación do Plan Xeral de Ordenación Municipal (PXOM), tendo en conta que, tal e como anunciou o presidente da Xunta, Alfonso Rueda, tras a reunión do Consello, o documento xa conta co visto e prace ambiental da administración autonómica.
Así o trasladou a presidenta local do partido e portavoz municipal, Marta Fernández-Tapias, quen advertiu de que “xa non hai escusas, nin para suspender nin para dilatar máis os prazos”.
Fernández-Tapias sinalou que “os socialistas se quedaron sen culpables aos que botar a culpa da súa propia incompetencia”, e reclamou ao goberno municipal de Abel Caballero que “por unha vez cumpra os prazos” e teña todo lista antes do 22 de setembro, data na que finaliza o prazo para a aprobación provisional da PXOM.
Pola súa banda, o BNG constatou que o PP se converteu agora “no maior facilitador e colaborador” do novo Plan de Vigo, “elaborado sen participación nin transparencia”.
O novo plan, apuntou o portavoz municipal nacionalista, Xabier Pérez Igrexas, “insiste nun modelo fracasado e insustentable”, que “non resolve o problema de acceso social á vivenda”, e que persiste nunha mobilidade “baseada no coche”, que “tronza as parroquias con viarias innecesarios”.
