Axentes da Policía Nacional da Comisaría de Vigo detiveron na cidade olívica a un home como presunto autor de dous delitos de roubo con violencia e intimidación, e un delito de estafa. Segundo informaron fontes policiais, a investigación arrincou a principios do mes de agosto, cando o 091 recibiu un aviso por un roubo con violencia cometido nun edificio do barrio do Calvario, onde un home subtraera a unha muller de avanzada idade varias das súas pertenzas.

A dotación que acudiu ao lugar atopouse ao sospeitoso nunha rúa próxima ao lugar dos feitos, retido por outra persoa. Esta testemuña explicou aos axentes que estaba a traballar nun edificio da zona e que escoitara os berros dunha muller pedindo auxilio. Na planta baixa do inmoble puido ver a unha muller no chan e a un home que tentaba abandonar o edificio. A vítima, de avanzada idade, contou á testemuña que o outro home acabáballe de roubar, polo que decidiu seguilo ata a chegada da Policía.

Segundo o relato da vítima, o sospeitoso abordáraa por detrás, agarrándoa con violencia pola cintura para arrastrala escaleiras abaixo, ata a planta inferior, onde a tirou ao chan e subtraeulle o bolso. As investigacións posteriores permitiron determinar que este home fora o autor doutro roubo violento na madrugada dese mesmo día. Co mesmo ‘modus operandi’, no interior dun portal, achegouse a outra vítima por detrás e agarrouna polo pescozo para tirala ao chan, e logo quitoulle o teléfono móbil, a carteira, e outros obxectos.

Posteriormente, o ladrón tentou usar o cartón bancario que roubara para facer pagos en varios establecementos da cidade. Por todo iso, ao sospeitoso impútanselle dous supostos roubos con violencia e unha suposta estafa. Tras pasar a disposición xudicial, decretouse o seu ingreso en prisión provisional.