O grupo empresarial vasco Asuco Interiors, cunha filial en Silleda, confirmou a súa oferta para facerse coa planta de fabricación de tarima de Maderas Iglesias no Porriño, en proceso de liquidación, e avanzou que o seu plan prevé un investimento de 2 millóns de euros.

A compañía (unha das dúas que optan a facerse coa fábrica porriñesa, e a única que xa opera no sector madeireiro) formalizou unha oferta vinculante para a adquisición e para reforzar así a súa posición nesta industria, “converténdose en líder nacional na fabricación de pavimentos de madeira”, trasladaron desde a empresa.

Asuco Interiors é unha empresa dedicada ao deseño, fabricación e venda de parquet para interiores que opera baixo a marca Asuco desde o ano 2015. Na actualidade a compañía opera en mercados internacionais desde a súa sede central de Azpeitia, á que se engade unha segunda planta de produción en Silleda, que é a filial desde a que se realizou a oferta.

En total, ambos os centros suman máis de 25.000 metros cadrados desuperficie, cunha capacidade produtiva anual de medio millón de metros cadrados de pavimento. En palabras da súa CEO, Faustino García-Moncó, “esta operación supón unha gran oportunidade para consolidar o crecemento e desenvolvemento de Asuco”, xa que o plan da compañía é introducir no seu portfolio “un segmento de produto cun prezo lixeiramente inferior ao desenvolvido pola matriz, pero mantendo a garantía de calidade de Asuco Interiors”.

O grupo vasco explicou que, se se fai cos activos de Maderas Iglesias, mantería a actividade da fábrica do Porriño (que ocupa unha superficie de 100.000 metros cadrados, cunha capacidade produtiva de 2 millóns de metros cadrados de parquet ao ano), dando continuidade “a gran parte do seu persoal, uns 70 empregados”, do total duns 160.

Ademais, asegurou que “xa se deron os primeiros pasos para a adecuación e modernización da planta, para o que prevé realizar un investimento de máis de 2 millóns de euros durante o próximo exercicio”, e engadiu que a operación facilitaría “o aumento progresivo do persoal nos próximos anos”.

PERSOAL “INSUFICIENTE”

Segundo informou esta semana o comité de empresa de Maderas Iglesias, hai unha segunda oferta para facerse coa planta do Porriño, a presentada por un grupo vigués, que contempla a conservación de 76 empregos.

En calquera dos dous casos, o órgano de representación dos traballadores advertiu de que as previsións de persoal son “insuficientes” e volveu a apelar á Xunta para que se implique na procura de investidores que manteñan o maior número posible de empregos.