O helicóptero medicalizado do 061 con base en Santiago evacuou este venres a unha muller que sufriu un posible desmaio mentres se bañaba na praia de Rodeira, no municipio de Cangas.

Segundo informou o 112 Galicia, sobre as 13,00 horas un particular contactou con Emerxencias para informar da presenza dunha bañista indisposta na auga, que perdera a consciencia. O CIAE avisou ao 061, así como á Policía Local e a Protección Civil de Cangas.

Fontes de Urxencias Sanitarias explicaron que, inicialmente, a alerta produciuse por unha posible parada cardíaca, pero que afortunadamente, esta non se confirmou. A muller, de 66 anos de idade, sufriría un desmaio e perdera a consciencia.

O 061 mobilizou unha ambulancia e o helicóptero con base en Santiago aínda que, ao chegar os efectivos e, tras unha primeira intervención dos socorristas, a muller xa “recuperara a consciencia e a respiración”.

As mesmas fontes indicaron que foi trasladada polo helicóptero ao hospital Álvaro Cunqueiro de Vigo, en situación estable e “boas condicións”.