Os bombeiros levan todo o verán esixindo un convenio colectivo e unha mellora das condicións. A sinstitucións pola súa parte non se sentaron a negociar por “estar de vacacións” e os bombeiros non poden máis.
Hoxe, dende a CIG anuncian o peche dun dos dous parques de bombeiros en Vigo por falta de persoal. Esta é a instalación de Coruxo que permanecerá clausurada até as 22:00 horas de hoxe ao haber só 12 efectivos operativos fronte aos 20 establecidos como mínimos polo Goberno local.
Por isto, dende a central sindical insisten no “desleixo” e na “falta de responsabilidade” do
Goberno local que actúa con “total pasividade” á hora de buscar unha solución a un “problema
crónico”, xa que o peche deste parque está a ser recorrente nos últimos meses.
“A Corporación municipal está a incumprir os mínimos de persoal que ela mesma aprobou para
garantir de forma mínima a seguridade da cidadanía, pondo en serio risco a súa integridade e
aumentando considerabelmente os tempos de resposta ante un sinistro ao deixar a cidade durante
un período de 24 horas só cun primeira saída”, sinala a CIG.
Ademais lembran que as ofertas de emprego no servizo de bombeiros dos anos 2020-2021-2022 están aínda sen executar, mentres que a de 2023 -que podería estar xa en marcha- atópase paralizada. “Por se isto fose pouco, as bases das oposicións fican paralizadas no departamento de recursos humanos dende o 30 de xuño de 2022”.
