A Consellería de Infraestruturas e Mobilidade, a través de Augas de Galicia, eliminou un punto de vertedura de augas residuais no lugar da Madalena, no concello de Cangas.

Os técnicos do programa de control de verteduras localizaron este punto da vertedura tras unha alerta comunicada polo servizo de emerxencias do 112. Os inspectores autonómicos localizaron deficiencias nun entroncamento de augas residuais á rede municipal de saneamento que, segundo a Xunta, orixinaba achegues irregulares.

“Estas irregularidades foron comunicadas ao ente titular destas instalacións para que adoptase as medidas oportunas para a emenda da vertedura”, apostila. Nunha nova inspección, constatouse o arranxo da rotura detectada.