Stellantis completou a adquisición do 33,3% de Symbio, unha empresa en mobilidade con hidróxeno de emisión cero propiedade de Forvia e Michelin, segundo confirmou este venres.
A compañía fabricante de automóbiles indica que este anuncio é un paso significativo na descarbonización da industria da mobilidade e ilustra a excelencia tecnolóxica de Symbio en innovacións de celas de combustible de hidróxeno.
Stellantis tamén sinala que a súa participación como accionista impulsará o desenvolvemento de Symbio en toda Europa e nos Estados Unidos. O acordo coas outras dúas empresas pechouse en maio e cada unha repartirase agora un terzo da participación.
“Adquirir unha participación igual en Symbio reforza a posición de liderado de Stellantis en vehículos propulsados por hidróxeno ao apoiar a produción de furgonetas de celas de combustible en Francia, e tamén serve como un complemento perfecto para a crecente carteira de vehículos eléctricos de batería da compañía”, afirmou a empresa nun comunicado.
