Un home, A.A.B. de 47 anos de idade, foi detido na madrugada deste pasado mércores en Vigo tras agredir e insultar á súa parella en presenza do seu fillo menor de idade.
Tal como informou a Policía Local, os feitos ocorreron minutos antes das 00.30 horas, cando os axentes foron requiridos nun domicilio da rúa Pizarro, onde se escoitaba unha forte discusión de parella e un menor pedía auxilio.
Unha vez no lugar, os funcionarios localizaron á muller en estado de ‘shock’ acompañada de varios veciños na entrada da vivenda. Ao non ser capaz de falar nin interactuar cos policías, estes solicitaron a asistencia dos servizos sanitarios para que a atendesen no punto.
Unha vez acougada, manifestou que no medio dunha discusión coa súa actual parella, este incrementou a súa agresividade, primeiro a través de insultos graves e logo propinándolle un empuxón. Todo iso en presenza do seu fillo menor, que se interpuxo entre os adultos para protexer á súa nai.
“O presunto autor dos feitos descritos chegou mesmo a descolgar un cadro e lanzalo contra ambos, continuando con insultos agora dirixidos tamén ao menor. Posteriormente o individuo abandonou o domicilio durante uns minutos, regresando momentos despois e comezando a golpear de novo con patadas e puñadas o mobiliario da vivenda, polo que a muller e o seu fillo pediron auxilio ata a chegada dos axentes”, recolle a Policía Local.
Por iso, deuse aviso para a procura do home, que foi localizado na rúa Couto San Honorato, sendo detido como presunto autor dun delito de violencia de xénero.
