As medidas de aforro enerxético postas en marcha no tres campus da Universidade de Vigo (UVigo) permitiron evitar un gasto de máis de 500.000 euros durante o inverno, ademais dunha emisión á atmosfera de 940,2 toneladas de dióxido de carbono (CO2). Así se destacou durante a última sesión ordinaria do Claustro deste curso académico 2022/2023, que se levou a cabo en Ourense.
Foi o adxunto ao reitor para a Sustentabilidade, Jacobo Porteiro, o encargado de explicar a estrutura do consumo de enerxía e o impacto que tiveron as medidas adoptadas entre novembro e marzo. Entre elas estiveron o cambio da xestión da calefacción e a climatización dos edificios, a prohibición do uso de dispositivos de calefacción individual eléctricos ou o apagado de computadores e de equipos cando non se usan. Son “medidas de impacto importante” pero que “valeron a pena”, segundo dixo Porteiro, que agradeceu a colaboración da comunidade universitaria.
Noutra orde de cousas, durante o claustro o reitor, Manuel Reigosa, destacou o éxito conseguido na concesión de proxectos europeos, tanto de investigación como educativos, apuntando a cifra de 11,5 millóns de euros captados en 25 proxectos no que vai de 2023.
O responsable académico tamén foi o encargado de presentar aos membros da comunidade universitaria un informe sobre o desenvolvemento anual do goberno no que dedicou un maior peso a temas referir# a persoal docente e investigador e ordenación académica.
