Os partidos da oposición no Concello de Vigo, PP e BNG, pediron ao alcalde, Abel Caballero, “dar a cara” e ofrecer “explicacións” polo “maior caso de corrupción” que afectou á administración local, o do ‘enchufe’ dunha cuñada de Carmela Silva nunha contrata municipal por parte dun funcionario que foi condenado a 5 anos de cárcere e que acaba de ingresar en prisión.
A portavoz municipal e presidenta local do PP, Marta Fernández-Tapias, preguntou “canto tempo máis van silenciar os socialistas vigueses o maior caso de corrupción que se lembra nos últimos anos en Galicia”.
Segundo trasladou nunhas declaracións remitidas aos medios, “o PSOE de Sánchez viuse acurralado polo escándalo que, desde o primeiro momento rodeou este caso, impedindo que manobrasen a favor do indulto”. “quedaron sen opcións”, asegurou Tapias, que advertiu de que nin Abel Caballero nin Carmela Silva “poden seguir escondéndose”.
Fernández-Tapias matizou, en todo caso, que aínda non se sabe quen deu a orde ao exfuncionario para que contratase á familiar de Silva e non descarta que o condenado “acabe desvelando o dato que, con tanto receo, gardan os socialistas vigueses”.
“INDUCTORES DO DELITO”
Na mesma liña pronunciouse o portavoz do BNG, Xabier Pérez Igrexas, quen subliñou que o ingreso en prisión do exfuncionario “non resolve” este caso, porque “queda por aclarar se houbo inductores ou inductoras do delito” e quen formaba parte da “trama corrupta que perpetrou o ‘enchufe'”. “É moi difícil crer que un alto funcionario, e destacado dirixente do PSOE, colocou por casualidade á cuñada da primeira tenente de alcalde”, apostilou.
Segundo incidiu, o BNG seguirá pedindo “chegar ata o final, caia quen caia” e afirmou que “é lamentable que o PSOE de Abel Caballero decidise encubrir este asunto tan grave”, negándose a condenalo en Pleno e “sen dar ningunha explicación á cidadanía”, chegando a bloquear a creación dunha comisión de investigación no Concello ou dunha oficina anticorrupción.
