Os sindicatos do metal da provincia anunciaron este venres a desconvocatoria dos paros anunciados para os días 12 e 13 de xullo, para “obrigar” á patronal a sentar a negociar, pero rexistraron xa a convocatoria de folga indefinida a partir do 18 de xullo se non hai acordo antes.
Así o trasladaron os portavoces de CIG, CC.OO. e UXT nunha asemblea celebrada na alameda Suárez Chairos de Bouzas, ao termo da manifestación que percorreu este venres as rúas do Vigo no marco das protestas pola negociación do convenio provincial.
Os representantes das centrais explicaron que o primeiro paso é a desconvocatoria das dúas xornadas de paro previstas para as próximas semanas, e contactar coa patronal para retomar as negociacións, xa que “o seu ego” non lles permite “baixar ao rodo”, como sinalou Celso Carneiro de CC.OO., e así “non terán escusas”.
En todo caso, anunciaron tamén a convocatoria de folga indefinida a partir do 18 de xullo se non hai acordo, e advertiron á patronal de que ten algo máis dunha semana por diante para sentar e “arranxar o conflito”. “Isto resólvese si ou si na mesa de negociación”, subliñou.
Pola súa banda, o responsable de Industria da CIG en Vigo, Xulio Fernández, proclamou que os sindicatos “non van ceder” e van gañar “” este conflito, porque o que reclaman para os traballadores “é de xustiza”.
Tras defender o “salto” á folga indefinida a partir do 18 de xullo, Xulio Fernández, subliñou que se manterá a presión “ata as últimas consecuencias” e criticou a Enrique Mallón, portavoz da patronal, a quen “hai que baixar os pantalóns”. “Aquí non se para nada”, asegurou, e denunciou a “represión” da policía aos traballadores, e o intento dos empresarios de “dividir” á parte social.
Na mesma liña, o portavoz de UXT, Rubén Pérez, tamén denunciou que se está tentado romper a unidade sindical e dos traballadores “desde moitas frontes”. Ante a convocatoria de folga indefinida, avisou que se avanza cara a “un momento difícil” polo que apelou á unidade de todos e incidiu en que o paro convocado manterase “contra vento e marea, custe o que custe” se chega o caso.
