A Confederación Hidrográfica do Miño-Sil (CHMS) remitiu ao Ministerio de Transportes, Mobilidade e Axenda Urbana o informe sobre o estudo hidrolóxico da variante de Cerdedo, que forma parte do proxecto para a chegada da liña de alta velocidade ferroviaria á cidade de Vigo.

Nun comunicado, o ente asociado ao Ministerio para a Transición Ecolóxica e o Reto Demográfico explicou este mércores que o informe “reflicte fielmente as peculiaridades do terreo en zonas do norte peninsular e destaca a viabilidade das actuacións descritas”.

A continuación, engade que durante a fase de execución dos túneles “han de establecerse exhaustivas medidas de seguimento e control para esta área considerada de influencia hidroxeolóxica”.

Pola súa banda, o presidente da CHMS, José Antonio Quiroga, sinalou que a ausencia deste informe “motivou en 2017 a caducidade do expediente de Avaliación de Impacto Ambiental (EIA), neglixencia que supuxo un atraso inxustificado a soportar polo cidadán”.

“A solicitude foi remitida pola Dirección Xeral de Planificación e Avaliación da Rede Ferroviaria a finais de xaneiro de 2023 e xa en febreiro esta CHMS rubricou o contrato de asistencia técnica para a análise da documentación co Instituto Xeolóxico e Mineiro, dependente do CSIC, atendendo á súa especialización en xeoloxía, hidroxeoloxía e ciencias xeoambientais”, afirmou Quiroga.

“Neste sentido, hai que lembrar que a complexidade do proxecto e as características do terreo levan un importante grao de incerteza, ao non ser posible modelizar a execución ao 100%”, engadiu o responsable do organismo hidrográfico, que apunta que o informe revela “a viabilidade do proxecto” pero recomenda “mellorar en puntos concretos a caracterización do medio físico, a través de sondaxes e modelos complementarios”.