A candidata do PP á Alcaldía de Vigo, Marta Fernández-Tapias, presentou este mércores o seu proxecto ‘Bouzas Litoral’ para converter a contorna da praia, a igrexa e o paseo nunha gran praza peonil, con zonas verdes, espazo aberto para comercio e actividades, e un aparcadoiro subterráneo.

A candidata presentou esta iniciativa (o terceiro gran proxecto, tras o ‘Roteiro Verde’ e o ‘Bulevar Ría de Vigo’) en Bouzas, xunto ao número 5 da súa lista, Miguel Martín, e detallou que consta de catro actuacións.

Así, proponse a peonalización completa da zona da Pérgola de Jenaro de la Fuente e a contorna do Liceo Marítimo; un túnel con acceso á zona portuaria e á VG-20 (para retirar o tráfico en superficie); un aparcadoiro soterrado de 315 prazas fronte á sede do Instituto de Investigacións Mariñas do CSIC; e a creación dun espazo aberto con marquesiñas para a celebración do mercadillo dominical e outros eventos.

Segundo Fernández-Tapias “trátase de abrir Bouzas ao mar”, humanizando a zona e mellorando a conexión da praia e o porto deportivo.

Finalmente, incidiu en que o PP mantén o seu compromiso de seguir dando aos vigueses “motivos” para que confíen na súa candidatura. “A nós non nos van a atopar no continuísmo e nos anuncios refritos, senón no futuro, nas ideas novas, transformadoras e vangardistas”, proclamou.