O PSOE de Vigo instou á Autoridade Portuaria, dependente da Xunta, a deixar de “actuar de costas á cidade” e a transformar a fachada marítima en Beiramar, seguindo o modelo de grandes urbes como Nova York, posibilitando a creación de espazos de esparexemento, zonas verdes e peonís ou o acceso directo ao mar.
Así o manifestou a vicesecretaria da executiva local do partido, María José Caride (que tamén é concelleira de Urbanismo), en declaracións aos medios. Caride constatou que o proceso de transformación no que está inmerso Vigo, da man dos socialistas, necesita da concorrencia doutros axentes, neste caso do Porto, porque “o Concello só non pode desenvolver o que a cidade necesita”.
Respecto diso, sinalou que o novo plan urbanístico pretende que a zona de Beiramar sexa “un novo elemento dinámico” da cidade, con chan residencial, terciario, dotacións públicas. “Pero non podemos se seguimos tendo un Porto que actúa de costas á cidade, cun viario cheo de camións, naves abandonadas (algunhas incendiadas hai anos), espazos de almacén sen ningún coidado arquitectónico,…”, engadiu.
María Xosé Caride subliñou a necesidade de que Porto e cidade vaian “da man“, e reclamou ao organismo portuario que, entre outras actuacións, faga un túnel en Beiramar para liberar a superficie (unha proposta que tanto o Porto como os propios usuarios da terminal rexeitaron hai tempo), que se poida converter Jacinto Benavente “nunha gran avenida e un gran paseo, con accesos peonís ao mar adecuados, permeable coa contorna”.
Así mesmo, referiuse a a obra de recheo no peirao próximo á lonxa, fronte ao Auditorio Mar de vigo, e proclamou que, xa que o Porto está a facer esa “vergoña”, debería destinalo a uso e goce dos cidadáns. A responsable socialista referiuse a actuacións levadas a cabo noutras cidades do mundo, encamiñadas á recuperación das fachadas portuarias, e puxo o exemplo dos peiraos abandonados “en Nova York”, rehabilitados para uso cidadán.