CC.OO. de Vigo rendeu este venres homenaxe á “loita obreira” de marzo de 1972 cunha ofrenda na rúa 10 de marzo da cidade olívica, e coa intervención de varios responsables sindicais, entre eles a súa secretaria comarcal, Montse Carrera, que lembraron os episodios sucedidos en Ferrol, co asasinato de Amador Rey e Daniel Niebla.

Carrera subliñou, en declaracións aos medios, que este acto, no que non faltou a música a cargo do coro do sindicato, debe servir para “reivindicar unha loita obreira moi grande”, especialmente a traxedia de Ferrol, polo que supuxo de mobilización e concienciación posterior.

Segundo recoñeceu a secretaria comarcal de CC.OO., esta efeméride “non está suficientemente recoñecida” pola sociedade galega e “hai que darlle máis presenza”, lembrando aos “compañeiros” que, “enfrontándose a unha ditadura, en plena opresión” mantiveron nas súas cabezas “a democracia, as liberdades e os dereitos”.

“Estamos aquí para agradecer o seu traballo e a súa loita, que agora nos toca a nós continuar“, proclamou Montse Carrera, que advertiu de que a sociedade e a clase traballadora seguen tendo, tras a pandemia de Covid, un reto: lograr “unha Europa máis social, desde cada empresa, desde cada sindicato e cada organismo de decisión”, na que “ninguén quede atrás”.