O consello de goberno da Universidade de Vigo (UVigo) aprobou este xoves a modificación das normas de elaboración do Plan de Organización Docente (POD).
Esta iniciativa, que saíu adiante por 34 votos a favor, un en contra e tres abstencións, centrou boa parte da sesión ordinaria do consello de goberno, que tamén deu ‘luz verde’ a outras modificacións do ámbito docente como o plan de promoción a profesor titular e catedrático ou á da normativa de dedicación e recoñecementos docentes do profesorado, entre outras.
Foi o vicerreitor de Profesorado, Alfonso Lago, o encargado de expor as modificacións das normas de elaboración do POD, que ten o obxectivo de ir adaptándoas ás necesidades do curso actual en canto a poder mellorar o desenvolvemento da docencia vacante que se produce ao longo do curso, a posibilidade de participación en tarefas docentes do persoal contratado en programas de investigación para que se rexan polo tipo de contrato e a figura á que estea adscrita e á actualización de diversas datas.
Neste punto, o rexeitamento da catedrática e integrante de Nós Universidade, Coral do Río, a que os investigadores posdoctorales teñan que impartir clase, no caso de non existir docente vacante, de forma simultánea con outro profesor, orixinou un debate.
“Isto incluíuse aquí porque hai departamentos que teñen tan pouca carga docente que non teñen espazo para os seus posdoctorales. Introdúcese aquí por unha problemática de moi poucos departamentos e que mostra a gran diferenza de carga docente por ámbitos e departamentos desta Universidade”, lamentou Do Río
