A Zona Franca de Vigo apoiará ao Concello de Caldas de Reis (Pontevedra) no desenvolvemento do polígono empresarial de Carracedo, polo que este luns o delegado do Estado, David Regades, e o alcalde, Juan Manuel Rey, acordaron pór en marcha o estudo de viabilidade e a firma dun convenio para o desenvolvemento desta zona.

“Zona Franca pode axudar ao Concello a enfocar as súas necesidades de chan porque temos unha experiencia de 75 anos desenvolvendo parques empresariais, que deron como resultado 8 millóns de metros cadrados para as empresas”, reivindicou Regades.

Pola súa banda, Juan Manuel Rey destacou o “interese enorme” do Concello polo desenvolvemento desta zona industrial. “Arrincaremos cun estudo de viabilidade que xa imos pór en marcha”, engadiu.

Nun comunicado, Zona Franca puxo en valor que o polígono de Carracedo dispón dun millón de metros cadrados e ten unha localización “central” no Eixo Atlántico, con acceso directo á AP-9, liña de alta tensión a 500 metros, gasoduto e infraestrutura ferroviaria próxima.