Con emoción e algo de tristura, as familias de acollida continúan a dicir adeus aos nenos saharauís que desfrutaron a beleza de Vigo e de toda a terriña galega durante dous meses de verán gracias ao programa Solidaridade Galega co Pobo Saharauí, que está pensando traer no futuro tamén a persoas da terceira idade, que non poden soportar as altísimas temperaturas de xullo e agosto.
Os nenos regresan en tres tandas desde Vigo ata África, resta aínda a última. Na noite deste mércores, as familias tiveron fronte ao Quiñones de León o seu último detalle de cariño cos nenos e nenas.
Derradeiras palabras e regresar a un Sáhara aínda non libre, un lugar cheo de dificultades e de xente valiosa, xenerosa, alegre. Á hora da comida, deixan un prato libre na mesa por se chega alguén famento. As portas están abertas.
Ti, occidental, tes reloxo. Eles teñen tempo. Pertencen a unha cultura diferente a descubrir. Coñecen as tormentas de area e centos de cousas que nós non, e á inversa. Por iso foi unha riqueza para todos por igual, que estes nenos visitaran Vigo e as nosas casas foran visitadas por eles.
E coñecer outra maneira de falar, de ollar, de transmitir e sentir. Por eso, na despedida, as miradas reflicten tristura, por todo o que saben que lles vai faltar, e tamén sabedoría.
Agora, nenos e familias retoman as súas vidas e agardan vivir esta experiencia un ano máis.
