Marea de Vigo apostará por volver presentarse ás eleccións municipais do próximo mes de maio tratando de ser unha “coalición de toda a esquerda alternativa”.

Precisamente esta semana a organización política celebrou unha asemblea xeral para informar os traballos que está a levar a cabo para configurar unha candidatura de “unidade popular”.

O seu portavoz, Rubén Pérez, subliñou que Marea de Vigo quere garantir a participación de toda a cidadanía no seu programa electoral, polo que levarán a cabo actos e reunións sectoriais para continuar o proceso de escoita activa.

No encontro aprobáronse as bases para concorrer ás eleccións, que se fundamentan na construción dunha coalición con formacións políticas coas que xa traballou nos últimos anos como Podemos, Esquerda Unida, Anova ou Equo.

Por iso, nos últimos días Marea de Vigo e o resto de organizacións políticas están a intensificar os labores para pechar esa candidatura unitaria e un programa de mínimos.