A Policía Nacional da Comisaría de Vigo identificou e propuxo para sanción a un segundo afeccionado por lanzar supostamente obxectos ao terreo de xogo durante un partido que enfrontou no estadio de Balaídos a Real Club Celta e Real Madrid o pasado mes de agosto.
Durante ese encontro, producíronse diversos lanzamentos de obxectos desde a bancada contra un dos xogadores madridistas e, pouco despois dos incidentes, os axentes de Policía lograron identificar ao suposto autor do lanzamento dunha botella, na bancada de Río Baixo. O afeccionado foi expulsado do campo e proposto para sanción que ascende a 6.000 euros.
Nese partido, os axentes tamén viron a outra persoa lanzando un chisqueiro ao campo, pero non puideron identificalo nese momento. Tras meses de pescudas, finalmente foi identificado e, o pasado domingo, durante o partido entre o Celta e o Athletic de Bilbao, axentes da Unidade de Intervención Policial, pouco antes do descanso, abordárono para confirmar a súa identidade e informarlle de que será proposto para sanción. O afeccionado abandonou entón voluntariamente o estadio.
A Policía Nacional lembrou que este tipo de accións e actitudes nos estadios poden levar sancións económicas de entre 3.000 e 6.000 euros, e mesmo a prohibición de entrar en recintos deportivos durante períodos de 6 meses a un ano.
