O Tribunal Superior de Xustiza de Galicia (TSXG) reduciu de 400.000 euros a 70.000 euros a indemnización á familia dun bebé de Vigo que naceu cunha patoloxía xenética, despois de que non se lle diagnosticase durante o embarazo.

Así, a Sala do Contencioso do TSXG estimou o recurso de apelación interposto polo Servizo Galego de Saúde (Sergas) e revogou a sentenza do Xulgado do Contencioso-Administrativo número 2 de Vigo, que fixou no seu día a indemnización en 400.000 euros, dos cales 200.000 euros serían para o neno e 100.000 euros para cada proxenitor.

Agora, marcouse unha nova cantidade de 70.000 euros, 30.000 euros para o bebé e 20.000 para o pai e a nai, o que implica a estimación parcial do recurso.

Todo iso porque os pais non foron “debidamente informados” as probas que se lle poderían realizar á nai para pescudar se o neno tiña algunha enfermidade dese tipo durante o embarazo.

Na súa sentenza, o TSXG explica que o maxistrado vigués optou por unha contía maior seguindo o exemplo doutra resolución do TSXG por un caso similar.

Con todo, “non pode compartirse a conclusión alcanzada” xa que no caso deste bebé o que pretende indemnizarse é unha falta de información á gestante e un dano moral derivado da falta de información da existencia dunhas probas médicas, que non estaban indicadas polo protocolo.

“Así, naquel caso, o menor tiña unha patoloxía máis grave, e tiña problemas de mobilidade. Así mesmo, naquel caso os pais manifestaran expresamente a súa vontade de interromper o embarazo, se a patoloxía diagnosticouse correctamente, como, por outra banda, xa fixeron cunha xestación anterior en circunstancias similares. Estas circunstancias non concorren no presente caso”, sentencia o TSXG, polo que reduciu a indemnización.