Tal e como xa adiantara o delegado da Zona Franca, David Regades, o pasado 30 de xullo, esta institución iniciou as obras de mellora e modernización do Centro Comercial A laxe, construíndo unha varanda na pasarela que une A Laxe coa “zona histórica” da cidade.
A varanda, trazada a ambos os dous lados da pasarela de 45 metros de lonxitude,
deseñouse seguindo o marcado carácter horizontal da fachada do edificio utilizando materiais xa existentes (aceiro lacado en negro) e en “clara consonancia coa contorna do Casco Vello”.
“O deseño proxectado respectou en todo momento a visibilidade sobre a ría e a súa contorna, ao ser este un dos valores máis destacados do paseo pola pasarela”, aseguran. Os traballos iniciáronse este xoves, e a finalización está prevista para mediados da próxima semana. O custo da obra ascende a un total de 26.500 euros.
“Con esta instalación, queda garantida a seguridade dos viandantes así como
a integración da nova intervención dentro do conxunto que conforman o Centro Comercial e o Casco Vello de Vigo”, subliñan desde a Zona Franca.