Caballero celebra o novo papel principal dos concellos na loita contra a violencia de xénero

Caballero e Carmen Calvo/ PSOE

O alcalde vigués, Abel Caballero, reuniuse este mércores no seu rol de Presidente da Federación de Municipios e Provincias (FEMP) coa vicepresidenta do Goberno e Ministra de Igualdade, Carmen Calvo, para tratar un tema, como el mesmo valorou, “da maior importancia”, a presenza dos Concellos tanto na loita contra a violencia de xénero como na atención ás vítimas da violencia de xénero.

Esta delegación de funcións fundaméntase “nun Pacto aprobado pola maior parte das forzas políticas e liderado polo PSOE, no que o Estado se compromete a apoiar os concellos na loita contra a violencia de xénero”, aclarou Caballero.

Engadiu ademais o presidente da FEMP que “este pacto, desde que se firmou ata agora pasaron moitos meses… Ata que chegou o goberno actual estivo practicamente conxelado. O goberno anterior non tivo ningún interese en desenrolaralo. Solamente cuando chega Pedro Sánchez se produce unha reactivación”.

“Hai unhas novidades importantísimas, que están case no marco do revolucionario, a favor dos concellos. Devólvese aos concellos as competencias na loita contra a violencia de xénero, a actuación preventiva e a atención ás vítimas. Isto é da maior importancia”, considerou o rexedor vigués.

Caballero e Carmen Calvo/ PSOE

“Por primeira vez nos últimos 5 anos, recuperamos competencias nun área tan importante como a loita contra a violencia de xénero. E os concellos queremos ser fundamentais nesta loita. Este é un cambio de enfoque que comparto ao cen por cen. Facer que a primeira liña de atención ás mulleres vítimas e seus fillos sexan os servizos sociais dos concellos“, defendeu.

“O goberno de España pelexa pola autonomía dos concellos, non aceptando a posición das CCAA de que os fondos contra a violencia de xénero sexan para eles. As comunidades pretendían recibir eles todos os fondos do pacto contra a violencia de xénero, todos. E gastalos eles. O goberno transmitiulles que de ningún modo”, celebra o presidente da FEMP.

Porque, segundo Caballero, os concellos “non necesitamos ningunha intermediación, nin moito menos que sexa a comunidade autónoma quen reciba os recursos que nunca chegan aos concellos. A relación directa entre municipios e goberno é importantísima”.

A inversión para evitar a violencia de xénero nos concellos duplícase, e os 20 millóns pasan a ser 40 millóns: “A cifra comeza a ser significativa. Eu quero valorar moito esta decisión do goberno de España, da vicepresidenta e da ministra de Facenda de duplicar a asignación o próximo ano”.

“Todos son avances, e todos son avances importantísimos para o municipalismo. Por eso eu valoro o papel do partido socialista no Pacto contra a Violencia de Xénero, a súa posta en funcionamento… Todo é espléndido”, selou.

 

DEIXAR UN COMENTARIO

Please enter your comment!
Please enter your name here