Inaugurada en Vigo unha mostra sobre o arquitecto Antonio Palacios con máis de 200 pezas, algunhas inéditas

Conta con tres percorridos nos que o público pode achegarse á produción arquitectónica, ás inquietudes artísticas e ás iniciativas culturais do artista.

O conselleiro de Cultura, Educación e Universidade, Román Rodriguez, na inauguración dunha exposición sobre o arquitecto Antonio Palacios no Museo do Mar de Vigo.. XUNTA

O Museo do Mar de Vigo inaugurou este sábado a exposición ‘Antonio Palacios. Soños de modernidade, compromiso con Galicia’, coa que a Xunta rende homenaxe a este arquitecto e urbanista galego ata xaneiro de 2022.

A mostra, que conta con máis de 200 pezas, algunhas delas nunca expostas. Entre elas, atópase a réplica da maqueta do ‘Plan Palacios’ para a cidade olívica, elaborada para a ocasión por alumnado do IES Politécnico. A exposición permanecerá aberta de martes a venres de 10,00 a 14,00 horas e de 16,00 a 19,00 horas. Sábados, domingos e festivos poderase visitar de 11,00 a 14,00 e de 17,00 a 20,00.

Á inauguración acudiu o conselleiro de Cultura, Educación e Universidade, Román Rodríguez, quen se referiu á “creatividade única” de Palacios, que lle permitiu deixar “unha pegada indeleble no imaxinario arquitectónico de Galicia”.

E é que, para o titular de Cultura da Xunta, o homenaxeado foi capaz de crear “unha marca propia” coa que “combinar vangarda creativa co modelo residencial galego”.

A exposición está comisariada, segundo informa a Xunta, polo catedrático de Historia da arte da Universidade de Santiago de Compostela (USC) Jesús Sánchez García. Conta con tres percorridos cos que o público pode achegarse tanto á produción arquitectónica como ás inquietudes artísticas e as iniciativas culturais de Antonio Palacios na súa traxectoria entre Galicia e Madrid.