Axentes da Policía Local de Vigo detiveron nas últimas horas a un veciño da cidade, A.J.M.V., de 73 anos de idade, como presunto autor dun delito de homicidio en grao de tentativa, despois de que acoitelase á súa filla no trancurso dunha discusión.
Segundo informaron fontes policiais, os feitos ocorreron á primeira hora da tarde deste luns, cando varias testemuñas alertaron da presenza dunha muller desorientada na Avenida de Beiramar.
Unha dotación desprazouse ao lugar e atopouse a unha muller vestida con bata e pixama, desorientada e confusa, e sangrando abundantemente por unha ferida no costado esquerdo. Aínda que inicialmente a muller era incapaz de falar, finalmente logrou explicar aos policías que fora atacada no seu domicilio.
Tras solicitar a presenza dunha ambulancia, que trasladou á ferida a un centro hospitalario, varios axentes foron á súa vivenda, na mesma Avenida de Beiramar, e atopáronse co pai da muller. Este explicou aos funcionarios que tivera unha discusión coa súa filla e que a atacou cun coitelo.
Segundo o seu relato, el atopábase descansando na súa cama, cando a súa filla, D.M.A., de 40 anos de idade, presentouse na habitación e abordouno para pedirlle diñeiro, xa que é consumidora de sustancias estupefacientes. Así se iniciou a discusión, na que o home acabou agredindo á súa filla.
Os axentes localizaron na cociña do domicilio a suposta arma do crime, un coitelo xamoneiro de 40 centímetros de folla. O home foi detido como presunto autor dun delito de homicidio en grao de tentativa.
