Axentes da Policía Local de Vigo identificaron nas últimas horas a tres menores, todas de 14 anos de idade, como presuntas autoras de varios furtos en establecementos da cidade, de onde subtraeron, entre outros efectos, produtos cosméticos valorados en máis de 1.300 euros.
Segundo informaron fontes policiais, os feitos ocorreron na tarde deste mércores, cando o 092 recibiu un aviso para acudir a un comercio da rúa Príncipe, onde unha empregada de seguridade mantiña retidas ás tres novas tras sorprendelas (a través do circuíto de cámaras) furtando varios produtos.
Unha vez no lugar, os policías identificaron ás menores e comprobaron que subtraeran produtos cosméticos valorados en 1.386,87 euros. Ademais, as nenas levaban encima máis efectos, posiblemente furtados doutros establecementos, como bixutaría ou aveños de maquillaxe.
A Policía contactou cos proxenitores para que se fixesen cargo das súas fillas e puxo as dilixencias en coñecemento da Fiscalía de Menores de Pontevedra.