Comisións Obreiras esixe á Universidade de Vigo “unha solución” para o persoal encargado dos ximnasios dos campus de Pontevedra, Ourense e da propia cidade olívica.
Este venres deixarán de prestar servizo as dúas empresas concesionarias e extinguiranse os contratos do persoal, segundo explica o sindicato, en virtude dunha resolución do 29 de xullo.
“Ademais da forma en que se produce este fin do contrato, CC.OO. critica que, no caso dunha das empresas, o persoal nin sequera foi avisado cos 15 días de anticipo a que obriga a lei“, apunta.
Ante esta situación, e debido ao “prexuízo que ocasiona” tanto a traballadores como a usuarios das instalacións –que deberán pechar temporalmente–, CC.OO. insta á universidade a intervir “para procurar unha solución transitoria”.
Por último, solicita a prórroga dos contratos ás empresas ata que se produza unha nova licitación “ou, na súa falta, que asuma durante ese tempo o persoal adscrito aos ximnasios”. En calquera dos supostos, CC.OO. pide “a subrogación de todos os traballadores”.
